Sul puèg d'a Sent-Ginas...

« Sul puèg d’a Sent-Ginas,
Darrièr lo bòsc bèl,
Lo pastre amatina,
Son polit tropèl.

De la crotz d’a Bonas,
Cada còp qu’i soi,
L’ausisse qu’entona,
La mèma cançon.

“De La Tremolièira,
Soi lo pastorèl,
De l’annada entièira,
Garde lo tropèl.

Suls puèges sauvatges,
Ont la burga ven,
Al mièg dels pascatges,
Ieu ni soi lo rei.

[Jusca que vau claure,
En tota sason,
Cante coma un paure,
Pastorèl que soi.]

Ambe quatre faisses,
De ginèsts tardius,
Fa(gu)ère amont jols fraisses,
Mon palais d’estiu.

[Quand l’altan bolèga,
Lo cap del garric,
Ambe ma manrega,
Ieu soi a l’abric.]

Quand la plèja tomba,
Sul cap d’aquel puèg,
Me'n vau dins la comba,
Entrò-z-a la nuèch.

Dempièi qu'un pairastre,
Aicí m’a lo(g)at,
Ai totjorn fach pastre,
Ai totjorn cantat.

Aime ma cabana,
Aime mon tropèl,
Ma còrna de bana,
E mon can fidèl.

Aime ma fònt clara,
Aval jos lo boisson,
Mai que tot encara,
Aime ma Lison.” »