Un còp mon fraire l'Escarmonget…

« Un còp mon fraire l’Escarmonget,
Me donèt per eritatge un siflet.
Un siflet aquò’s pas un escritòri,
Un escritòri aquò’s pas lo Purgatòri,
Lo Purgatòri aquò’s pas lo Paradís,
Ni mai la lèbre aquò’s pas un perdís,
Un perdís aquò’s pas una lèbre,
Una comba aquò’s pas un sèrre,
Un sèrre n’es pas una comba,
Ni mai un tinau aquò’s pas una bomba,
Una bomba n’es pas un tinau,
Ni una mula aquò’s pas un chivau,
Un chivau aquò’s pas una mula,
Una femna mòrta n’es pas viva,
Una femna viva n’es pas mòrta,
Ni mai lo varrolh aquò’s pas la pòrta,
La pòrta aquò’s pas lo varrolh,
Ni mai la nièira aquò’s pas un pesolh,
Un pesolh aquò’s pas la nièira,
Lo vailet aquò’s pas la chambrièira,
La chambrièira n’es pas lo vailet,
Ni mai la bleda aquò’s pas un caulet,
Un caulet aquò’s pas una bleda,
Un moton aquò’s pas una feda,
Una feda aquò’s pas un moton,
Ni mai la filha aquò’s pas un garçon,
Un garçon n’es pas la filha,
Lo vilatge n’es pas la vila,
La vila aquò’s pas lo vilatge,
Ni mai la carn aquò’s pas lo fromatge,
Lo fromatge aquò’s pas la carn,
L’armari aquò’s pas lo placard,
Lo placard aquò’s pas l’armari,
Lo curat aquò’s pas lo vicari,
Lo vicari n’es pas lo curat,
Ni mai un òme qu’a un pauc de sens es pas fat ! »