Aprene la musica

« “38 ans, òc, que jogue pas, qu’aviái pas jogat, perque aviái abandonat. Joguère… Quand… M’amusère a aprene la musica juste après l’escòla aquí, encara me caliá anar gardar las vacas apr’aquí, lo dimenge e tot… E ben preniái lo libre defòra per legir, quoi, l’estudiave... E après, comencère de jogar, aviái 17 ans... E après, quand agère fach lo regiment, joguère pas que dos ans. Apuèi m'arrèstère, aquò m’agradèt pas pus.
– Aquò fa que joguèretz pendent 5 o 6 ans ?
– 6 ans. 6 ans.
– E arrestèretz d’un còp ?
– Arrestère d’un còp ! M’aviá degostat que n’aviái tròp. Aviái tròp de trabalh e, puèi, s’èra estat mon mestièr, auriá plan anat, mès que èra pas mon trabalh. Autrament, ganhave d’argent, è ! D’aquel temps, se ganhava pas mal d’argent. Òm aviá pas… Cal dire qu’òm aviá pas de despensas coma uòi. I aviá pas de micro, i aviá pas de... Anàvem… Nos desplaçàvem amb una bicicleta, o amb una mòto. Après, crompère una mòto mès que, al debut, è !, marchave en bicicleta... Aviam pas tròp lo sòu !
– Quant fasiètz de quilomèstres en bicicleta ?
– Ò !, en bicicleta, ai agut fach 30 quilomèstres ! 30 quilomèstres. Alara, de còps que i a, quand las còstas èran tròp longas, [metiái] la bicicleta suls braçs e preniái las acorchas. Per anar economisar 7 o 8 quilomèstres, preniái l’acorcha. Mès que tanplan fasiái 1 quilomèstre d’acorcha ambe la bicicleta sus l’esquina. Podiái pas passar, pas que de carrièirons de lèbre. »