L'ivèrn 1956

« En 56, agèrem de temperaturas que davalèron jusca -32°. Urosament que los naucs, las abiuradas èran dins l’estable !
Lo merchand de vin nos aviá portat una mièja-pèça de vin que aviam metuda dins de palha, a la granja, urosament que n’aviam sortit la mitat que jalèt coma la barra !
Jasiam pas a l’estable, aquò èra pas la mòda dins aquela bòria, mès fasiá talament de freg que, un jorn, anèrem jaire a l’estable.
Las formas que aviam fachas l’auton, de formas de trenta o quaranta-cinc quilòs, las aviam metudas a l’ostal e las aviam acaptadas ambe de vièlhas cobèrtas de lana, mès esclatèron quand mème. Èran vengudas coma de ròcs.
Se caliá levar la nuèch per metre de boès al fuòc.
Quand anàvem vojar las carrugas de fems, dins aquel ostal avián dos chavals entièrs, que fasián la monta de las ègas, metiam un chaval davant cada parelh de buòus. Mès, quand èrem al cap de prat e que lachàvem lo chaval, èra lèu a la pòrta de l’estable. E los buòus, quand arribavan, avián un quilò de glaça a cada uèlh e al nas. »